भक्तपुर । अभिनेता नाजिर हुसेनको मुख्य भूमिका रहेको चलचित्र ‘गुन्यो चोलो – द ड्रेस’ को नयाँ गीत सार्वजनिक गरिएको छ। मंगलबार ओएसआर डिजिटलको युट्युब च्यानलमार्फत सार्वजनिक गरिएको ‘म फूल हुँ कि काँडा’ बोलको गीतमा नाजिर हुसेनले आफ्नो दमदार नृत्य प्रस्तुत गरेका छन। मनिषा पोखरेलको स्वर रहेको उक्त गीतमा लेखु सहयात्रीले शब्द तथा संगीत भरेका छन्। सार्वजनिक गीतमा कमल राईको कोरियोग्राफी रहेको छ ।

चलचित्रमा नाजिरले एक पारलैंगिक महिलाको चुनौतीपूर्ण भूमिका निर्वाह गरेका छन्। यस भूमिकालाई यथार्थपूर्ण बनाउन उनले आफ्नो तौल समेत घटाएका थिए। समुन्द्र भट्ट निर्देशित यस फिल्ममा नाजिरसँगै सञ्चिता लुइँटेल, सुशिल सिटौला, राजकुमार घोष, शिशिर राणा, अनुपम श्रेष्ठ, विशाल पहारी,उत्तम केसी लगायत कलाकारको अभिनय देख्न पाइनेछ। फिल्मको कथा, पटकथा र संवाद समुन्द्र भट्ट र नाजिर हुसेनको संयुक्त लेखनमा तयार गरिएको हो।

‘दि स्काइ ओसन इन्टरटेन्मेन्ट’को ब्यानरमा निर्माण भएको फिल्ममा अमेरिकी कम्पनी ‘भिजन इन्टरटेन्मेन्ट’ले सहकार्य गरेको छ। फिल्मका एसोसिएट निर्देशक भद्र भुजेल, निर्माण नियन्त्रणमा पुष्कर लामा, र व्यवस्थापनमा यम ओली रहेका छन्। फिल्मको छायांकन आलोक शुक्लाले गरेका हुन् भने सम्पादन माइकल हेरिङले गरेका छन्। ‘गुन्यो चोलो – द ड्रेस’ आगामी भदौ १३ गतेदेखि देशभर प्रदर्शनमा आउनेछ।