भक्तपुर – भदौ १० गतेबाट प्रदर्शनमा आएको दिनेश राउत निर्देशित फिल्म ‘प्रकाश’ले हलमा दर्शकसँगै राजनीतिकर्मीलाई पनि तानिरहेको छ । प्रकाश फिल्म केही दिनयता विभिन्न राजनीतिक दलका नेताहरुले हेरिरहेका छन् । यसै क्रममा, शनिवार माओवादी केन्द्रका नेता तथा शिक्षा तथा प्रविधि मन्त्री देवेन्द्र पौडेलले पनि प्रकाश फिल्म हेरे । पौडेलले प्रकाश फिल्म हेरेपछी फिल्ममा प्रयोग दृष्य तथा बिम्बप्रति आपत्ति जनाएका छन् । फिल्ममा कम्युनिष्ट पार्टीको झण्डा प्रयोग गरिएको छ भने जनयुद्धको पृष्ठभूमि र बेपत्ता परिवारको प्रशंगलाई प्राथमिकताका साथ उठाइएको छ । उनले यस्ता दृष्य तथा बिम्बहरु १० वर्ष जनयुद्ध लडेर आएको माओवादी पार्टीप्रति लक्षित गरिएको र राजनीतिक पूर्वाग्रहसहित फिल्म निर्माण भएको बताए ।

प्रकाश फिल्म शिक्षासँग भन्दा राजनीतिसँग सम्बन्धित रहेको उनको निष्कर्ष छ ।  मन्त्री पौडेलले भने- ‘मैले फिल्म हेर्दा शिक्षासँग भन्दा पनि एउटा आस्थासँग र राजनीतिसँग सम्बन्धित देखेँ । फिल्मभित्र देखाइएको कम्युनिष्ट पार्टीको झण्डा, त्यहाँ प्रस्तुत गरेको बिम्ब, गलत काम गर्नेलाई जनयुद्ध लडेको पार्टीबाट निर्वाचन जितेको देखाइएको छ । यसको सन्देश शिक्षासँग भन्दा पनि कुनै एक राजनीतिक दलसँग सम्बन्धित भएर फिल्म निर्माण भएको मलाई महसुस भयो ।’ ‘प्रकाश’ एउटा आन्दोलनसँग जोडिएको भन्दै जुन स्थानको कथा देखाइएको हो त्यहाँका जनताले यो कति यथार्थ हो भनेर फैसला गर्ने उनको भनाई छ । ‘फिल्मको अन्त्यमा जुन दृश्य देखाइएको छ, त्यो वास्तवमै भएको छ कि छैन भन्ने कुरा जुम्लाका जनताले फैसला गर्ने कुरा हो । तर, आज पनि त्यहाँका जनताहरुको विश्वास त्यही जनयुद्ध लडेको पार्टीप्रति छ,’ मन्त्री देवेन्द्र पौडेलले भने ।