काठमाडौं। गगन थापाले नेतृत्व गरेको नेपाली कांग्रेसलाई निर्वाचन आयोगले आधिकारिक मान्यता दिएको छ। थापा नेतृत्वको कांग्रेसले आयोगमा आधिकारिकताको लागि दिएको निवेदनको आधारमा आयोगले आधिकारिकता दिने निर्णय गरेको हो। राजनीतिक दलसम्बन्धी ऐनको दफा ५१ अनुसार विवरण अद्यावधिक गर्दै आयोगले थापा पक्षलाई आधिकारिक कांग्रेसको मान्यता दिने निर्णय गरेको हो। कार्यवाहक प्रमुख निर्वाचन आयुक्त रामप्रसाद भण्डारी र जानकी तुलाधारले गगन थापा समूहलाई आधिकारिक कांग्रेसको मान्यता दिएका हुन्। थापा समूहले पुस २७ देखि ३० सम्म काठमाडौंमा विशेष महाधिवेशन आयोजना गरेको थियो। विशेष महाधिवेशनबाट सभापतिमा निर्वाचित थापासहितका पदाधिकारीले बिहीबार आयोगमा निवेदन दिएकोमा आयोगले आधिकारिक कांग्रेसको मान्यता दिएको छ। शेरबहादुर देउवा पक्षीय पूर्णबहादुर खड्कालगायत नेताहरूले शुक्रबार बिहान आयोगमा निवेदन दिँदै आफूहरू आधिकारिक भएको दाबी गरे पनि आयोगले गगन पक्षलाई आधिकारिक कांग्रेसको मान्यता दिएको हो। गगन पक्षले मान्यता पाएपछि अब चुनाव चिह्न रुख र चारतारे झण्डा पनि उनीहरूकै हुने भएको छ।​